عن مركز أبحاث وجراحة المايستوما..

 

بقلم : د. احمد الطيب ابراهيم استشاري جراحة الكلي
مكان السجنِ مستشفى
مكان المنفى كليّه

مكان الأسري ورديّه

مكان الحسره أغنيّه
مكان الطلقه عصفوره
تحلق حول نافوره
تمازج شُفّع الروضه
حنبنيهو
البنحلم بيهو يوماتى
وطن شامخ وطن عاتي
ما بنبيهو فرااااادي
ولا بضجة في الرادي
ولا الخطب الحماسية

القصيدة دي بتاعة محجوب شريف وبغنيها وردي واتبناها كل الشعب السوداني كشعار لثورته الفريدة ولم أجد من طبقها عمليا مثلما طبقها بروف فحل….
— مركز شرطة سوبا القديم الان تم تحويله إلي امتداد لمركز المايستوما والآن يبني علي اراضيه (( مركز تأهيل مرضي المايستوما ))….
انا ما عارف اكلمكم عن المركز وللا عن بروفسور فحل وللا عن المايستوما !!!!!
نتكلم عن فحل أولا:
— ميتين وخمسين 250 ورقة علمية تم نشرها في مختلف المجلات العلمية باسم بروفسور احمد حسن فحل ..
— صاحب اكبر citation في العلماء السودانيين يعني اكتر زول تم الرجوع إلي دراساته و الاستفادة منها في الأوراق العلمية العالمية لباحثين آخرين…
— البروفسور الوحيد في السودان العنده باب تاااام في أشهر كتاب جراحة عالمي يدرسه كل طلاب الطب في العالم و كل جراح (( بيلي اند لوف Bailey and Love surgery textbook ده الفرمالة بتاعة الجراحين وطلاب الطب وأساتذة الجامعات ….
يعني بصريح العبارة اي طالب طب أو جراح متابع ومطلع في العالم الان بيعرف بروفسور احمد حسن فحل ونحن في السودان بنعرف ايه ؟؟؟؟؟؟
خلوها مستورة….
عارفين يا اخوانا اكتر حاجة لفتت نظري لما دخلت مكتبه في المركز لقيت مكتب المدير مترين في تلاتة أمتار وتربيزة و كراسي تلاتة عادية جدا و كرسي واحد اقل فخامة من كرسي اي سكرتيرة في اي مكتب انا شفته في السودان…
— قلت لي مستر سيد عثمان السيد والله انا مما اجي داخل مكتب مدير و القي السكرتيرة عيونها كبااار وكله كبااار في كبااار و ماشة تتني من فوق وتحت …. وادخل لي جوة القي الكراسي الفااااارهة ديك بعرف المدير ده ما زول شغل و طوالي بركز مع السكرتيرة وانسي ليك المدير ذاتووووو ….
ايوا بعاين والماعجبو يشغل سكرتيرة شينة هو البنات الشينات ديل ربنا ما خلقن !!!!!!
يا حليلهن الشينات ليهن الله وعيشة السوق 🤲 (( اخوات الكجم )).
— المركز فخم جدا والمكتب متواضع جدا و داخل المركز كل شئ في منتهي الترتيب و الزوق و العلمية و يتبع أدق التفاصيل العلمية و العالمية…. يا اخي انا لما طلعت من الباب و عاينت لي مستشفي سوبا قلت للجماعة المعاي الان بحمد الله رجعنا إلي ارض السودان… رغم انه المركز نفسه جزء من مستشفي سوبا..
قلت لي مستر سيد الجماعة ديل ما بدونا معاهم عنبر مسالك بولية لمرضي المايستوما البولية؟؟؟
— طبعا سيد ده من اخوانا الدبايب قال لي بتدوروا تنجسهوا بي قساطركم ديك وللا شنووو يا ناس المسالك ؟؟؟؟
خشمي عندي ولا رديت ليه 😷..
—عدد المرضي المتابعين في المركز وتم إجراء فحوصات وعمليات ليهم حتي الان عشرة الف مريض كل واحد فيهم عنده فائل ورقي و فائل سوفت وويرد كوبي و وكل معلوماته في الكمبيوتر و موجودة في تطبيق كلاود Cloud علي الانترنت …. كل الفحوصات مجانا و العلاجات مجانا و عليهم المتابعة مدي الحياة…
— بصراحة المركز ده وحده خلال تلاتة شهور فقط قام بنشر عشرين ورقة علمية يعني لو استمر بنفس الطريقة ح ينشر خلال عام واحد تمانين بحث علمي عالمي.
— يعني لو كل مركز في اي مجال في السودان اشتغل بنسبة اتنين في المية 2% من ناحية بحثية من مما قدمه مركز الماييستوما نحن ح نكون مع المانيا في سرج واحد…
وما شرط البحث ده يكون في الطب و للا الزراعة المهم يكون إضافة للمجهود العالمي البينتج يوميا….
— مركز تأهيل مرضي المايستوما يتم إنشاؤه علي ارض مركز شرطة سوبا شرق القديم و ده عبارة عن مبني شين ومعفن و يشمل عدد من المكاتب المتهالكة والتعيسة إضافة إلي حراسات و مكاتب اعتقال سابقة الان يتم بناء :.
عدد من الورش الفنية لتعليم المرضي الذين تم بتر طرف منهم جزئيا أو كليا وما اكثرهم … سوف يتم إعادة تاهيلهم و تعليمهم حرف ومهن جديدة أو تقوية مهاراتهم السابقة لتطويرها وتعليمهم طرق تطوير مشاريع صغيرة تكفل لهم حياة كريمة…
— يوجد به مشتل كبير جدا لتعليم المرضي طرق التعقيل والشتل والزراعة وكيفية إقامة مشاتل في اماكن سكنهم بعد التأهيل لنشر ثقافة التشجير والبستنة في السودان والغريب في الأمر انه صاحب المشتل و صاحب الفكرة هو مهندس كهربائي وشغال في وزارة الطاقة…والاغرب من ده كله اكتر من مية الف خريج من كلية الزراعة في السودان و قاعدين عطاأألة(( غايتو جنس غايتو )))…
شكرا يا باشمهندس …. نحن ذاتو ناس زراعة البزرعوا في الكراسات و البينشات ديل ما حاسبنهم زراعيين …
— المشروع ده في ناس خيرين دعموه اولهم هشام يعقوب عبدالرحمن ودعمه بمبلغ 37 الف دولار …و الحكومة اليابانية بي 80 الف دولار …و منتظرين دعم الخيرين الآخرين وقبل ما تدفع قروشك عليك الله امشي زور المركز ده ….
— في واحد من الخيرين علمنا من مصادرنا الخاصة انا ومعي عوض السيد(( دبيب كبير برضه )) جاء اتبرع للبروف بي سيارة بوكسي دبل كبينة…قام البروف شال البوكسي وداهو وزارة المالية وتم تسجيله باسم مركز المايستوما و ركب ليه نمرة صفراء مكتوب عليها حكومة و جابوا المركز… طبعا ده عكس ما كان يتم في التلاتين سنة الماضية حيث يتم تمليك العربات الحكومية للمدراء و تغير اللوحات الصفراء إلي ملاكي علي عينك يا تاجر ….
–‘يا اخوانا بروف فحل ده لو اغترب الليلة وانضم إلي اي جامعة في السعودية وللا قطر كل مرتب شهر ح يشتري ليه سيارة دبل كبينة جديدة لنج ..
هو في جامعة لاقية ليها استاذ يكون عنده شابتر في أشهر كتاب جراحة في العالم…وعنده 250 بحث منشور في المجلات العلمية العالمية. …
هذا قليل عن بروفسور فحل و لكن يجب أن تعرفوا ان وراء كل ورقة علمية تم نشرها قصة علمية و مئات من القصص الإنسانية المحزنة لمرضي سودانيين و آخر حقيقة فضلت أن اكتبها لكم عن المركز :
— هذا المركز يستقبل
مرضي من مصر
مرضي من الصومال .
–مرضي من الهند
— مرضي من بنغلاديش
—مرضي اثيوبيا واريتريا
— مرضي من السعودية
—مرضي من اليمن

و كل مريض يبحث عن أفضل مركز لعلاج المادورا في العالم يتم تحويله إلي هذا المركز و بذلك يكون المركز الوحيد في السودان الذي يستقبل مرضي من دول اجنبية بدلا من تحويله المرضي سودانيين إلي دول اخري….
—كل شهر المركز ده بسير قافلة خارج الخرطوم لإجراء عمليات تزيد عن مية عملية لقرية أو مدينة ما .. وبمشوا كلهم جراحين و مساعدين و فنيين وصيادلة و بيقعدوا من تلاتة يوم لحدي إسبوع في مكان القافلة….
— مستر السماني وداعة حتي الان هو الجراح التاني بعد بروفسور فحل في المركز ولسه راكز معاه ومواصل فهل يستطيع معه صبرا ؟؟؟؟
اشك في ذلك فالجراحين ديل كبيرهم وصغيرهم ما عندهم صبر وما عندهم دين ايضا….

هذا المركز يعتبر نقطة ضوء في هذا النفق المظلم الذي وقعنا فيه…و يعتبر نموذج للبناء العلمي والعملي للوطن …يعني بي صريح العبارة امسك حتتك الشغال فيها وابنيها وابني نفسك كده بتكون بنيت السودان ذي ما بروف فحل عملها فهو رب المايستوما و للسودان رب يبنيهو … ورب دي قاصد بيها صاحب يعني ما اله ….

ماهي المايستوما؟؟
هي المايستوما ايوا هي المادورا هي النبت ولو داير تعرفها ادخل النت و فتش براااك مادورا تقوم ليك في رأسك الكبير ده .. اي حاجة دايرها جاهزة…
(( افتح اليوتيوب وكتب :

جولة في مركز المايستوما الوحيد من نوعه في السودان ….في قناة الجزيرة مباشر ))
كده ظابط معاك اصلكم ناس يوتيوب ساي ما ناس قراية عارفكم ود المزعل منكم ناس الجرائد والصحف…..
-‘– احكي ليكم قصة عن المادورا حصلت لينا انا و زميلي د عبد الرحيم دبوره ونحن امتياز سنة ((دو )) …
دبوره ده الان جراح بتاع كبد شااااااطر جدا … يعني عادي ممكن يشيل تلاتة ارباع كبدتك و يزرعها لي حبوبتك وانت و حبوبتك تجوا طالعين في أمان الله….
— انا و دبوره كنا في مدينة سودانية جميلة جدا واهلها طيبين حلوين … دبورة نبوتشي في الجراحة و انا في التوليد…..
جات ست بعد الولادة عندها مغص شديد وانا شغال في مريضة عندها نزيف وقلت لي دبوره اكشف عليها قبل ما اجيك…..
— شال الجوينتي وسامعو ليك ((( اووومك مادورا vagina ))…
يا زول انت متأكد مادورا هنا …. وراني الجونتي ملان حبيبات سوداء…
لبست الجونتي و كشفت عليها وركزت شوية وقلت لي امها الزولة دي ختيتي ليها تفل بتاع قهوة هنا….؟؟
— قالت لي ايوا ده بن دافئ قلنا بطلع الخلاصة لعلو ما بسويلا شئ ؟
— قلت ليها لو ما فيهو جنزبيل ما بيعملها الحبة دي …..
وضحكنا انا و دبوره وامها والداية والمريضة ذاتها وهاك يا زغاريد لما طلعنا الخلاصة الكانت محتبسة داخل الرحم و هاك يا صندوق الببسي و صندوق البرنجي لينا انا ودبوره والمحلبية والكركار لي عاشة بنت فنونة( الداية) وتحياتي لي عاشة بنت فنونة وان شاء الله تكون بصحة جيدة و اذا وقع مقالي لأحد معافها فاليقريها تحياتي…انا و دبوره
وما زلت اقول لي دبوره عندما نلتقي مادورا شنو قلت لي ؟؟؟ …
عموما يا بروف فحل انا ودبوره ح نجيك نتعلم مادورا من جديد بعد ما بقيتوا تفحصوها بال DNA وما تنسي عنبر المسالك البولية لمرضي المايستوما البولية حقنا…
و لعلمكم بعد عشرين سنة من ضحكنا علي جهل تلك السيدة التي و ضعت البن لايقاف النزيف اكتشفت ان هناك دراسات علمية تؤكد فعالية البن في ايقاف النزيف من الجروح القطعية
https://www.baltimoresun.com/news/bs-xpm-2008-12-22-0812210077-story.html

الرابط اعلاه يؤكد أن البن المسحون يساعد في ايقاف النزيف مع فائق اعتذاري للسيدة تلك عن جهلنا الطبي…

ودمتم سالمين
د احمد الطيب ابراهيم استشاري جراحة الكلي
19/3/2021

تعليقات فيسبوك