الطيب عبد الماجد يكتب عن محمود عبد العزيز: جواب للبلد!

بقلم: الطيب عبد الماجد
جواب للبلد …!!
الحوت كيفك ….!!
الليلة تمنية سنين مما مشيت ….!! تتخيل ….!!
شوف الأيام دي بتجري كيف ….!!!
زووول نساك مافي …!!
بس الفرق مافي أغنيات جديده …!!
لكن ( الشفوت ) قالو غناك كل ما يقدم ببقى أحلى
( غايتو جنس حب )….!! 😍💕
لكن انت ذاتك بتستاهل ياخ …!!
وبتتحبا….!!
السودان كويس ياجان ….!!
شوية حمى كدا قالو دى آثار جانبية من ( لقاح ) الثورة والأجسام المضادة …!!
وفي شوية صداع برضو ….لكن إن شاء الله شدة وتزول
ونعبر مدن أعمق خيال نتغنى باللهج الصريح
دا مش غناك …!؟؟
بس السوق مولع نار ياحاج ….والحاجات غالية شديد
يا حوت ….!! الناس تعبانة والله ….!!!
بتحاول ( تجازفا ) كدا لكن الوجع في الجوف شديد …
وأنت عارف السودانين رغم الحالة الصعبة غايتو أهو دافرين …!!
وكأني مديون للعذاب ….!!
لكن طبعًا زي ماعارف الناس متوكلة ….والإيمان عالي الحمد لله …!!
طبعًا الحفلات مع ( كورونا ) فيها مشكله ….!!
وكورونا روحت ناس كتيرة ربنا يرحمهم ….والله كريم علينا …!!
الشباب الكانو بجوك في نادي الضباط وبسكوك في نادي التنس ديلاك ( بطنم طااامة) كان شفتا ياجان ….!!
قالو ماشافو حاجه لي ( ثورتم ) لحدي هسا ….!!
بس راكزين يا حوته زي ما بتعرف….!!
لسا اعلامهم 🇸🇩🇸🇩 ديك مرفوعة وماسكنها …!!
وقاعديييين …..!!!
مرات بطلعوا مناورات كدا وبملو الشوارع ….وبملو العين …!!
وحارسين ( الثورة ) دي لي هسا
بحزن شديد لما الآقيهم مرات كدا محبطين ….!!
بخاف الإحباط دا يزيد عليهم ويتمكن منهم ….!!
بتبقى مشكلة ….!!
لأنو جزء منهم كدا محبط شديد لدرجة إنو عايز يطلع ويهاجر يسيب البلد كلها ….!! وسنبك وكلام زي دا ….!!
غايتو بنتكلم معاهم طوااالي إنو الحياة دي أصلاً اختباراتها صعبة ….والأمور حتمشي وكلام زي دا … لكنك أبشرك الغالبية واقفين قنا ✌️
تتذكر يا حوته الجواب الكنت رسلتو داك …حتى سميتو ( جواب للبلد ) …!!
كل يوم بفتحوهو ….وبقروهو
بتصدق ….!!!
ياخ رغم غيابك لكن صورك قاااااعدة يا معلم
ملصقة في الحافلات والركشات …..!!!
أصلو ما غبتا …..!!
الضحكة ديك ذاتا واللطافة …….!!
وإبتسامة حبيبي تكفي لما كان بينا الغرام
حقك انت أقلو توفي لو تفوت بس بالسلام…..!!
المهم يا جان …في النهاية البلد دي لازم تمشي قدام
مهما حصل ….!!
ولا شنو ….!!؟
تتذكر طوالي كنت تشيل وتذكر فيهم
أبقو الصمود ما تبقو زيف …..!!
يا حليلك ياجان ….!!
الأهل كلهم بخير ولله الحمد ….!!
الجماعة في ( المزاد ) كويسين بس مشغولين مع الحياة لكن طبعًا مهما حصل ياهم السودانيين البتعرفهم ديلاك …..!!
بتفقدو بعض …ويشاغلو بعض …وعشرة الأيام …
ومرات ضحكات وقفشات كدا وسط العتمة ….!!
زي ماكنت انت بتعمل …!!
وشايل جراح ….!!
( ود أبو الريد ) صاحبك داك عرس …!!
بكى شديد يوم العرس ….قال إنت قلت ليهو ليهو إنك حتغني في عرسو ……!!
ما جاب فنان …!!
بس ( ساوند سيستم ) وغناك مدور ….!! والجماعة معاهو ….!! بهجة جد …!!
لمن جات أغنية كأني مديون للعذاب الشباب اتذكروك شديد وبكو ….!! العريس ذاتو بكى…!!
بس ولايهمك استغفرو بعد داك …!!
ودعوات تقيلة …!!!
تكون وصلتك …!!🤲
لاناسك الزمان اتغيروا …..!!
ولا اتغيرتا أنا …!!
المهم أطمنك ياجان مهما حصل ومهما حيحصل أصلو البلد دي ما بنخليها لي زول ….!! البلد دي حقتنا كلنا وبتشيلنا كلنا ….!!
مستحيل نفرط فيها لي أي شخص ….!!
أي زول أناني وبحب نفسو وعايز يضرع فيها براهو …..دا ما زولنا ….!!
نحن ناسنا ياهم الفي الشوارع ديل …!!
السودانيين الجميلين المسالمين الطيبين البحبو الناس والبلد والنيل ….!!
البحضرو الكورة ….وبمشو بيت البكا
وبحصلو العقد ….!
البصلو العشا في الجامع …..!!
وبجاملو العريس في الصالة ….!!
وبحبو الكابلي …!! ومشغلين الحوت
السودانيين اهل الفزعة والتواصل …!! البكرمو الناس وبحترموهم ….!! الأنقياء الأطهار ….الطلعو يوم تلتين
وترسو الخرطوم دي ما خلو فيها شبر ….
ياهم ديل ناسنا …!!
أرقد بسلام يا محمود ويظلك الرحمن بظله …..!!
نسيت أقول ليك …..!!
الشباب كلهم يغروك السلام وقالو ليك
ماراجع أنا لي مطالب ….!! وباقين صمود
الظروف صعبه والحياة ضاغطة لكن أملنا كبير
وعشمنا أكبر ….
ومن الظروف ما تشيلي هم
بكره الزمن ليك يبتسم
يالطاله في صبح العشم
اصبري وما تشيلي هم
ما تشيلي همك في الدموع
بحر الحزن ما ليه قيف
راجنو يوم فرحاً كبير
شوق انتظار عندك نقيف …..!!
ماتشيلي هم ….!! 🌹😍✌️
والله راجنك لمن بهناك ….!!! 🇸🇩
صحي يابلد …؟؟
ياجاااااااااااااااان …!!!

تعليقات فيسبوك